UIT DIE HOOF SE KANTOOR 2018

WOW!!! Wat ‘n fantastiese Jaar!!

2018 het bo alle verwagting uitgedraai as een van die jare om te onthou in die geskiedenis van Morgenzon Landbou Akademie. Gedurende die jaar is daar mylpale bereik wat alle vorige hoogtes oortref het. Ons het ‘n wonderlike jaar beleef op akademie, sport- en kultuurgebied en was die prestasies wat bereik was fenominaal.

Die Leuse vir 2018 was: Jy het drie keuses in die lewe nl. GEE OP, GEE IN, OF GEE ALLES.
Die leerders van Morgenzon het in 2018 gestand gedoen aan ons leuse en het ALLES gegee vir MLA.

Deur harde werk, motivering en deursettingsvermoë van die hoof, personeel, beheerliggaam, leerders en betrokke ouers, die afgelope jaar, het Morgenzon Landbou Akademie nuwe hoogte punte bereik waarop elke Landtie trots kan wees. By Morgenzon Landbou Akademie poog ons daarna om elke kind tot sy volle potensiaal te laat ontwikkel deur aan soveel moontlike aktwiteite deel te neem.

Op landbougebied het ons deelgeneem aan die tweede Alfa Skou te Parys en het Morgenzon Landbou Akademie twee spanne ingeskryf vir die skool van die jaar kompetisie. Dit is vir ons ‘n voorreg om aangewys te word as Landbouskool van die Jaar 2018. Voorwaar die hoogste prestasie wat bereik is in 2018.

AKADEMIE:

Besonderse akademiese is behaal in 2017, met een leerder met ses onderskeidings, een met drie onderskeidings en ‘n groot aantal leerders met onderskeidelik twee en een onderskeidings. Die Rekord-eksamen se uitslae het hoë verwagtinge geskep vir die eindeksamen 2018 en streef die skool ook na ‘n 100% slaagsyfer van Graad R tot Graad 11.

SPORT:

Die hoogtepunt van die jaar was Stallions 0/19 rugby. Hulle was die Virseker Noordvaal Kleinskole wenner van 2018 en het hulle Hoërskool Stella geklop in ‘n titaniese stryd
37-15. Die 0/17 Mustang rugbyspan het in die semi-finaal uitgeval en die 0/15 rugbyspan het in die kwartfinaal uitgeval. Drie leerders was ook deel van die Mauritz Hansenspan wat in Engeland gaan rugby speel het. Die jaar het ons ook vir die eerste keer ‘n dogtersrugbyspan in die veld gestuur en het hulle derde in die liga geëindig. Op die atletiekbaan was daar ook besonderse prestasies met baie Victrix- en Victor Ludorum toekennings. Netbal 0/19 wen die jaar weer Gert Sibande kleinskole liga en behaal derde plek op provinsiale kompetisie. Sewe leerders is opgeneem in die Mpumalanga span vir die Nasionale hengelkompetisie wat in Desember gehou word te Bloemhofdam. Op die Jukskeibaan het MLA ook uitstekende prestasies opgelewer tydens ‘n Internasionale kompetisie te Zeerust en is drie leerders in die Mpumalangaspan opgeneem vir die Nasionaal en een leerder het Proteakleure verwerf vir 0/19 Jukskei. Op die perdebaan spog ons met ‘n eerste plek op SANESA in Western Riding.

Tel op die tou, aan die tou, gereed, TREK. Ai die Toutrek darem. Weereens het dié van krag tot krag gegaan. Ons het aan vier gewigsklasse deelgeneem en bo verwagting briljant presteer nl. 460 kg (silwer medalje), 520 kg (brons), 560 kg (goud) en in die 600 kg klas het ons ook goud geneem.

KULTUUR:

Vir die eerste keer in baie jare het ons in 2018 ‘n volledige redenaarsspan ingeskryf en behaal ons ook ‘n vierde plek op die Interhoër 2018 kompetisie. Een leerder was wel aangewys as wenner in die Junior Redenaarsklas. Landsdiens het ook die jaar weer provinsiale kampe bygewoon en was baie aktief deur die jaar.

JEUGSKOU:

Drie skoue in Mpumalanga was bygewoon en 28 leerders verwerf ook hulle Mpumalanga kleure. Die Nasionale Jeugskou was aangebied te George gedurende die Septembervakansie en het ons leerders ook besonders goed presteer. ‘n Groot hoeveelheid leerders het plekke behaal onder die top 7 in die land.

So het 2018 ook aan sy einde gekom. WOW!! Wat ‘n besonderse jaar op alle gebiede het ons beleef. Baie dankie aan elke ouer en borg wat bygedra het om so ‘n sukses van 2018 te maak…. 2019 sal sy sokkies moet optrek as hy beter as 2018 wil wees.

Leuse vir 2019: ONS KIES DIE LEWE

 

 
 

This website designed and maintained by GSD Potch - The WEB people...  - www.gsdpotch.com